Аляксандр Шчэковіч: «Прадстаўнікі прафсаюзаў – лідэры меркаванняў. Яны павінны ісці ў калектывы і казаць пра важнасць удзелу ў рэферэндуме».

Такое меркаванне выказаў на ІІІ пленуме Мінскага гарадскога аб’яднання прафсаюзаў яго старшыня.

Цяперашні пленум праходзіць за два тыдні да лёсавызначальнай для нашай краіны падзеі – рэферэндуму па Канстытуцыі. Абноўлены Асноўны Закон дэталёва выпрацоўваўся на працягу доўгага перыяду, улічвалася меркаванне кожнага беларуса. Менавіта таму тэма Канстытуцыі і неабходнасці яе змены была вядучай.

Калі пытаешся ў людзей “Хто трымаў у руках Канстытуцыю?” звычайна атрымліваеш станоўчы адказ толькі ў былых студэнтаў, якім даводзілася здаваць канстытуцыйнае права. Гэта сведчыць аб тым, што дзейны Асноўны Закон працуе і дазваляе нам жыць спакойна. Але час рухае нас наперад, свет мяняецца, адпаведна, Канстытуцыі трэба пад яго падладжвацца. І зараз галоўная задача прафсаюзнага актыву, як лідэраў меркаванняў, данесці да людзей неабходнасць прыйсці на рэферэндум і прагаласаваць за сваю будучыню.

Аляксандр Шчэковіч
старшыня Мінскага гарадскога аб’яднання прафсаюзаў

Канешне, на пленуме былі падведзены вынікі мінулага года. Так, у сталіцы было створана 506 пярвічак. У параўнанні з 2020-м гэтая лічба павялічылася ў разы (у 2020-м – 154 арганізацыі). У лідэрах – Цэнтральны, Маскоўскі і Фрунзенскія раёны.

Сур’ёзная ўвага надавалася і ахове працы. За 2021 год тэхнічныя інспектары правялі праверкі і маніторынгі больш як у 680 арганізацыях, выявіўшы звыш 5400 парушэнняў. Нягледзячы на прыкладзеныя намаганні, у мінулым годзе не ўдалося захаваць станоўчую дынаміку па зніжэнню вытворчага траўматызму. З удзелам прафсаюзаў праведзена 141 расследаванне няшчасных выпадкаў на вядзенні.

Падводзілі вынікі і прававой працы. У мінулым годзе грамадскі кантроль ажыццёўлены ў 527 арганізацыях, выяўлена звыш 2100 парушэнняў. Прафсаюзныя юрысты склалі 36 іскавых і іншых працэсуальных дакументаў, а сума вернутых грошай, якія наймальнік раней незаконна ўтрымаў ці не выплаціў, перавысіла 200 тыс. рублёў.

Сярод іншых пытанняў, якія ўзнімаліся на пленуме, – запазычанасць па зарплаце (у IV квартале мінулага года яе дапусцілі 16 арганізацый), узровень беспрацоўя (на канец снежня склаў 0,1%), кантроль за цэнавай сітуацыяй. Таксама Аляксандр Шчэковіч падвёў вынікі пастаяннай акцыі “Прафсаюзы – дзецям” (толькі на падрыхтоўку дзяцей да школы са сродкаў прафбюджэту аказана дапамога на суму каля 700 тыс. рублёў) і конкурсу “Мінскі майстар”, адна з мэт якога – павышаць цікавасць да рабочых прафесій. Дарэчы, у 2021 годзе ўдзел у спаборніцтве прынялі больш за 1500 работнікаў, а пераможцамі сталі 28 найлепшых у сваёй справе.

• 

• 

•